Translations are evolving and should be taken as indicative only! For a guide to the tones and the spelling system used to write this variety of Isaan (Khon Kaen), see the "tone guide" on the overview page.

Tones: M = mid, HR = high-rising, H = high, HF = high-falling, LF = low-falling

Isaan	Pronunciation	Tones	Thai	English/Notes	#occ
หั้น	han	LF	ที่นั่น	there, over there	32/21

Link to overview page
Link to dictionary

Basic vocabulary — Page 31 — Series B, pictures 06-08: half, onion, banana, melon

6
อันนี้คืออี่หยัง อันนี้กะเป็นหัวหอมเนาะ มีหัวหนึ่ง ถืกผ่าเคิ่งไปแล้วซ้ำแมะ
แล้วอีกเคิ่งหนึ่งหนะ มันไปใส อันนี้กะจักคือกัน กะบ่ฮู้เนาะ เห็นเคิ่งเดียว อีกเคิ่งหนึ่งเขาอาดสิเอาไปเฮ็ดแนวกินแล้ว หลือว่าเอาไปปุงแนวกินแล้วเนาะ กะเห็นเคิ่งเดียว ถืกผ่า ถืก เอาเหลียไว้หั้น เอาจ่งไว้หั้นเนาะ

7
อันนี้คืออี่หยัง อันนี้กะเป็นก้วยเนาะ เป็นก้วยน่วยหนึ่ง ถืกผ่าเคิ่งไปแล้วซ้ำแมะ เหลียอยู่เคิ่งเดียว
แล้วอีกเคิ่งหนึ่งมันไปใส กะจักคือกัน เขาอาดสิกินเคิ่งหนึ่ง แต่ว่าเขาใซ้มีดปาดเคิ่ง แล้วเคิ่งหนึ่งนั้นกิน แล้วกะเหลียเคิ่งหนึ่งไว้ หลือว่าจ่งเคิ่งหนึ่งไว้ เอาไว้ถ้ากินทีหลังกะได้เนาะ

8
อันนี้คืออี่หยัง อันนี้เป็นบักแตง หลือว่าแตงโมเนาะ เอิ้นง่ายๆ กะบักแตงนั้นหละเนาะ
เห็นเคิ่งเดียว เห็นเคิ่งน่วยเนาะ อีกเคิ่งหนึ่งจักมันไปใส เหลียเคิ่งเดียว จ่งไว้เคิ่งเดียว เคิ่งน่วยข้อหล้อเนาะ

Basic vocabulary — Page 23 — Series B, pictures 16-17: spade, to dig

16
อันนี้คืออี่หยัง อันนี้เป็นพั้ว
พั้วนี้เอาไว้ถ้าเฮ็ดหญัง พั้วนี้กะใซ้ได้หลายอย่าง เอาไว้ไปตักดิน ตักปุย ตักอี่หยังกะได้ที่เฮาสิสามาดเอามันไปตักได้
พั้วเฮ็ดมาจากอี่หยัง กะเฮ็ดมาจากเหล็ก หลือว่าเหล็กเปๆ
พั้วนี้ค้ายๆ กับบักจกคือกัน แต่ว่ามันก่นบ่ได้ แต่ว่าสามาดซ้วนได้หลือว่าตักขึ้นมาได้
มันกะสิต่างจากบักจกหน่อยหนึ่ง ขั้นบักจกกะสามาดขุดได้ ก่นได้ ตักขึ้นมากะได้ แต่อันนี้เอาไว้ถ้าตักขึ้นมา ซ้วนขึ้นมาซื่อๆ ก่นกะก่นได้ ก่นได้หน่อยเดียว บ่สามาดก่นได้ลึก

17
เขากำลังเฮ็ดหญัง กะมีพุซายพุหนึ่ง เขากำลังใซ้พั้วอันหนึ่งนี้หละ กำลังจับพั้ว แล้วกะตักดิน อาดสิซ้วนดินขึ้นมา หลือว่าตักดินขึ้นมาจากในหลุมกะได้
แล้วเขาไปตักดินหลือว่าไปเฮ็ดอี่หยังอยู่หั้น เขากะอาดสิเฮ็ดปูกผัก หลือว่าเฮ็ดสวนนั้นสวนนี้ ปูกอันนั้นปูกอันนี้ เขากะเลยใซ้พั้วอันนี้ไปตักดิน หลือว่าไปพวนดินกะได้

Basic vocabulary — Page 31 — Series B, pictures 09-10: to give, present, flower

9
เขากำลังเฮ็ดหญังสองคนนี้ กะมีพุหญิงกับพุซายเนาะ เขากำลังให้ของขวนกัน
กะมีพุซายคนหนึ่งถือของขวนก่องบักใหญ่เอาโลด ก่องสีแดง มีผูกลิบบิ้นพ้อมพุ้นแหล้ว สีเหลียงเอ้อเฮ้ออยู่
ก่องบักใหญ่พุ้นแหล้วของขวน จักอี่หยังอยู่ในหั้น
กะเป็นพุซายเนาะ ถือให้ กำลังสิเด่ให้พุหญิง เด่ของขวนนี้หละ เด่ของขวนก่องสีเหลียงใหญ่ๆ หนิหละเอาให้พุหญิง
แล้วเขาให้ในวันอี่หยัง หลือว่าในเนี้ยงโอกาดอี่หยัง กะเญียงว่า อาดสิเป็นแบบว่าในวันเกิด หลือว่าวันเลียนจบ หลือว่าวันอี่หยังกะได้ที่เหมาะสม หลือว่าที่สามาดให้ของขวนกันได้เนาะ

10
เขากำลังเฮ็ดหญัง กะมีพุซายพุหนึ่งกำลังเด่ดอกไม้ให้พุหญิงเนาะ กำลังเอาดอกไม้ให้พุหญิง
มีดอกเดียว ดอกงามซ้ำแมะ มีดอกเดียว ดอกสีเหลียงพ้อม กำลังเด่ไปพุหญิง
แล้วพุหญิงกำลังสิเด่มือมาลับเอาเนาะ กำลังสิลับเอาดอกไม้นั้นเนาะ
แล้วพุซายเอาดอกไม้นี้ให้พุหญิงเฮ็ดหญัง กะจักคือกัน พุซายคนนี้อาดสิมักพุหญิงคนนี้กะได้ กะเลยเอาดอกไม้ไปมอบให้ หลือว่าไป เอาไปยื่นให้พุหญิงคนนี้เนาะ

Basic vocabulary — Page 25 — Series B, pictures 08-10: to stand, sidewalk, car, dirt, trousers, to splash

8
เขากำลังเฮ็ดหญัง เขากำลังยืนอยู่ เขายืนอยู่เทิงฟุดบาด
ฟุดบาดข้างถะหนนนั้นหละ เป็นหม้องทางญ่างเนาะ เป็นหม้องญ่าง อยู่ข้างหนทางนั้นหละ เขากำลังยืนอยู่หั้น ยืนอยู่พุเดียวข้อหล้อ จักว่าเขายืนเฮ็ดหญัง

9
เกิดอี่หยังขึ้นตอนนี้ กะคนวั่งหั้นหละ คนที่เฮาเว้าฮอดวั่งหั้นหละ ที่เขากำลังยืนอยู่เทิงฟุดบาด ยืนอยู่พุเดียวนั้นหละ เขากำลังยืนอยู่
แล้วกะมีลดคันหนึ่ง ขี่ผ่านมา เป็นลดเก็งดอก เหยียบน้ำบัดหนิ เหยียบน้ำฟ้งใส่เขา ฟ้งใส่พุซายคนนั้นหละ เปียกเบิด เปียกส้งเขาเบิดบัดหนิ
แล้วน้ำหม้องที่ลดคันนี้เหยียบหนะมาแต่ใส จักเลว จักว่าน้ำอันนี้มันมาแต่ใส ฝนอาดสิตก กะเลยน้ำมาข้อนอยู่หนี้กะได้ หลือว่าคนสิเอาน้ำมาเทไว้หนี้กะได้ เฮากะบ่ฮู้จักนำว่าน้ำอันนี้มันมาแต่ใส

10
เกิดอี่หยังขึ้นตอนนี้ กะลดคันวั่งหั้นหละมันขี่ผ่านไป เหยียบน้ำฟ้งใส่ส้งเขา ส้งเขากะเปียกเบิดนั้นตั๊วะบัดหนิ จักเขาสิเฮ็ดหญังต่อไปแล้วเด้อ ฮู้แต่ว่าเขากำลังยืนโจ่โล่อยู่พุเดียวคือเก่านั้นหละ
แล้วคือฮู้ว่าส้งของเขาเปียก กะฮู้ตั๊วะ ส้งมันเป็นสีเปียกๆ เนาะ เบิ่งแล้วส้งกะเปียกคักๆ แล้วนั้นหนะ น้ำกะเต็มส้งเขาอยู่ ญ้อยลงมาเต็มเกิบเต็มส้งเขาอยู่

Basic vocabulary — page 20 — Series B, pictures 06-08: tree, forest, to cut

6
นี้คืออี่หยัง อันนี้คือต้นไม้ อันนี้เป็นต้นไม้
มีต้นเดียวข้อหล้อ เกิดอยู่ต้นเดียวข้อหล้อ
ต้นไม้นี้กะมีส่วนปะกอบหลายสิ่งหลายอย่าง แต่ละอย่างนั้นกะสิแตกต่างกันออกไป มีใบพ้อม มีกิ่งก้านพ้อม มีลำต้นพ้อม มีฮากมันพ้อม

7
อันนี้คืออี่หยัง อันนี้เป็นป่า เป็นป่าไม้ป่าไหล้
แต่ว่าขั้นอยู่พากอี่สาน หลืออยู่อี่สานนี้ กะสิเอิ้นว่าโคก
ป่าใหญ่ๆ ที่มันเป็นป่าใหญ่ๆ กะสิเอิ้นว่าโคก
ป่าหลือโคกนี้มีปะโยดจั่งใด กะมีปะโยดหลายเติบ มีปะโยดคัก เพาะว่าในป่านั้นสิมีต้นไม้ มีหญ้ามีเอ่ย มีหลายสิ่งหลายอย่างที่อยู่ในหั้น แล้วกะเป็นหม้องอาสัยของสัดต่างๆ แล้วกะซ่อยเฮ็ดให้โลกเป็นตาอยู่พ้อม เฮ็ดให้โลกบ่ฮ้อน ขั้นโลกนี้บ่มีต้นไม้ โลกกะสิฮ้อน โลกกะสิบ่เป็นตาอยู่

8
เขากำลังเฮ็ดหญัง เขากำลังตัดต้นไม้ หลือฮานต้นไม้นั้นหละ
เขาฮานไปเฮ็ดหญัง อันนี้กะบ่ฮู้คือกัน จักว่าเขาสิเอาไปเฮ็ดหญัง เขาอาดสิเอาไปเฮ็ดก่อส้าง หลือเฮ็ดบ้านเฮ็ดเอ่ยเฮ็ดอี่หยังกะได้
ไม้นี้สามาดเฮ็ดอี่หยังได้แน่ กะเฮ็ดได้หลายอย่าง เฮ็ดบ้านกะได้ เฮ็ดเถียงนากะได้ เฮ็ดฮั้วบ้านกะได้ เฮ็ดเฟอนิเจอกะได้
เขาใซ้อี่หยังตัดต้นไม้ เขาใซ้อี่หยังฮานต้นไม้ เขาใซ้ขวน อันนี้คือเอิ้นว่าขวน ขวนเป็นค้ายๆ กับมีด แต่ว่ามันสิแข็งแลงทนทานกว่ามีด มันสิสามาดตัดต้นไม้ง่ายๆ ได้

Basic vocabulary — Page 27 — Series B, pictures 08-10: pond, water, shallow, deep

8
เขากำลังเฮ็ดหญัง มีพุซายพุหนึ่ง เขากำลังยืนอยู่ ถอดเสี้ยผ้าเบิด เหลียแต่ส้งโตเดียวข้อหล้อ
เหลียแต่อี่หยังเกาะ เหลียแต่ส้งโตเดียว เขาใส่ส้งโตเดียว ส้งขาสั้น ส้งสีเหลียงซ้ำแมะ
แล้วเขายืนเฮ็ดหญังอยู่หั้น เขาอาดสิอยากเหล้นน้ำ หลือว่าอยากลงไปในน้ำกะได้

9
เขากำลังเฮ็ดหญัง กะมีพุซายคนหนึ่ง เขากำลังยืนอยู่ในน้ำ
ยืนอยู่ตื้นๆ ดอก บ่ลึกหลาย บ่ได้ลงไปลึก เพียงขาเขาหนิหละ
แล้วเขาลงไปเฮ็ดหญัง จักคือกัน เขาอาดสิอยากเหล้นน้ำ เขากะเลยสิลงไปเหล้นน้ำกะได้

10
เขากำลังเฮ็ดหญัง เขากำลังเหล้นน้ำ
ฮู้ได้จั่งใดว่าเขากำลังเหล้นน้ำ เขากะอยู่ในน้ำ กะเลยฮู้ว่าเขากำลังเหล้นน้ำ
แล้วเขาเหล้นน้ำอยู่กับใผ เขาเหล้นอยู่พุเดียว ตอนนี้เห็นเขาเหล้นอยู่พุเดียว
เขาเป็นพุหญิงหลือเป็นพุซาย เขาเป็นพุซาย กำลังหว้ายน้ำท่วนๆ อยู่
แล้วเขาเหล้นน้ำอยู่ลึกบ่ กะอาดสิลึกอยู่ เพาะว่าเบิ่งแล้ว เพียงเอิกของเขาหลือว่าเพียงบ่าไหล่ของเขาเอาโลด น้ำกะคือสิลึกหลาย เขากะอาดสิลงไปลึกหลายหนั้นหละ
แล้วพุซายคนนี้เขาหว้ายน้ำเป็นบ่ กะอาดสิหว้ายเป็น ขึ้นหว้ายบ่เป็น เขากะบ่ก้าลงไปลึกปานนั้น ขั้นคนหว้ายน้ำบ่เป็น เขากะบ่ก้าลงไปลึกปานนั้น ขั้นเขาหว้ายเป็น เขาจั่งก้าลงไป หลือว่าก้าไปเหล้นน้ำหม้องลึกๆ เนาะ

Basic vocabulary — page 21 — Series B, pictures 10-13: toilet, shower, to shower, to dry oneself

10
นี้คืออี่หยัง อันนี้เป็นโถส้วม อันนี้เป็นโถส้วม
โถส้วมนี้เอาไว้ถ้าเฮ็ดหญัง โถส้วมนี้กะมีปะโยดหลาย มีปะโยดคัก
ขั้นพุใดท้องเสีย หลืออยากเข้าห้องน้ำ หลือปวดเญี่ยว กะสามาดนั่งอยู่โถส้วมนี้ได้ หลือขี้หลือเญี่ยวอยู่ในโถส้วมนี้
อันวางตั้งอยู่ข้างๆ โถส้วมกะสิเป็นถังน้ำ มีน้ำอยู่ในหั้น แล้วกะมีขันพ้อม
ญามเฮาขี้แล้ว หลือเญี่ยวแล้ว เฮาอยาก[สิ]ทำความสะอาด หลือล้างโถส้วมนี้ เฮากะตักน้ำ เอาขันตักน้ำอยู่ในถังนั้น แล้วกะมาลาดลงอยู่ในโถส้วม

11
นี้คืออี่หยัง อันนี้เป็นฝักบัว เขาเอิ้นว่าฝักบัวอาบน้ำ
เขาเอาไว้ถ้าเฮ็ดอี่หยัง กะเอาไว้ถ้าอาบน้ำ หลือทำความสะอาดล้างกาย

12
นี้คืออี่หยัง อันนี้เป็นสะบู เป็นสะบูเหลว
เอาไว้ถ้าเฮ็ดหญัง เอาไว้ถ้าอาบน้ำ หลือไว้เอาทำความสะอาดล้างกาย
และสะบูนี้มันมีกิ่นหอมบ่ กะหอมอยู่ ขั้นมันมีกิ่นเหม็น คนกะสิบ่ใซ้ ขั้นมันมีกิ่นหอม คนกะสิมัก คนกะสิเอามาใซ้ เพื่อที่สิให้ล้างกายเฮาหอมๆ หลือเฮ็ดให้โตเฮาหอมนั้นหละ

13
เขากำลังเฮ็ดหญัง เขากำลังเซ็ดโต
เขาเซ็ดโตเฮ็ดหญัง เขาอาดสิอาบน้ำหัวกะแล้ว เขากะเลยสิเซ็ดโต
เพื่อว่า เขาอาบน้ำหัวกะแล้ว โตของเขากะสิเปียก มันสิมีน้ำติดอยู่โตของเขา เขาอาดสิอยากให้โตเขาแห้ง เขากะเลยสิเซ็ดโต เพื่อว่าโตเขาสิได้แห้ง เขากะเลยเอาผ้าเซ็ดโตนี้มาเซ็ดโตให้มันแห้ง

Basic vocabulary — Page 24 — Series B, pictures 05-08: shop/store, food stall, clothes, hairdresser

5
นี้คืออี่หยัง อันนี้คือล้านขายของ หลือว่าล้านสะดวกซื้อเนาะ
ในล้านนี้กะสิมีหลายสิ่งหลายอย่าง หลือว่าขายหลายสิ่งหลายอย่างอยู่ในล้านอันนี้
ญามเฮาต้องกานอี่หยัง หลือว่าอยากซื้ออี่หยังที่มันเป็นสิ่งน้อยๆ หลือว่าซิ้นน้อยๆ แน่ๆ เนาะ เฮากะสามาดที่ไปซื้ออยู่ในล้านอันนี้ได้
แล้วล้านขายของอันนี้เปิดตะหลอดเวลาบ่ กะแล้วแต่ล้าน บางล้านกะเปิดยี้สิบสี่ซั่วโมง หลือว่าเปิดเบิดมื้อเบิดค่ำ แต่ว่าบางล้านกะเปิดซั่วคาว หลือว่าเปิดได้ญามมื้อเว็นส่ำนั้น

6
นี้คืออี่หยัง อันนี้คือลด เป็นลดขายแนวกิน หลือว่าลดขายกับเข้าเนาะ
แล้วเป็นหญังเขาคือมาขายเทิงลด เป็นหญังเขาคือขายของอยู่เทิงลด กะจักคือกัน เขาอาดสิบ่มีเป็นล้านขาย เขากะเลยมาขายอยู่เทิงลด เพื่อที่ว่าเขาสิได้ขายแนวกินนั้นเอง
แล้วเขาขายอี่หยังแน่ กะขายเป็นแนวกิน ขายกับเข้าเนาะ อาดสิเป็นขายอาหานตามสั่งกะได้ ที่คนอยากกินอี่หยังกะไปสั่งเขา แล้วเขากะสิได้กินแนวอันนั้นเนาะ

7
นี้คืออี่หยัง อันนี้กะเป็นล้านขายของ แต่ว่าเป็นล้านขายเสี้ยผ้าเนาะ กะขายหลายสิ่งหลายอย่างเกี่ยวกับเสี้ยผ้า หลือว่าแนวใส่ หลือว่าแนวนุ่งห่มเนาะ
กะอย่างเซ้นมีเสี้ยผ้า มีเทิงส้งแน่ มีเสี้ยแน่ มีเกิบแน่ มีหลายสิ่งหลายอย่างเกี่ยวกับแนวใส่ของคนเนาะ

8
นี้คืออี่หยัง อันนี้กะเป็นล้านคือกัน ล้านตัดผม
อันนี้เป็นล้านตัดผมเนาะ เป็นล้านบอลิกาน เพื่อที่ว่าสิให้คนมาตัดผม
แล้วในล้านนั้นแนมเข้าไปหนะสิมีอี่หยังแน่ กะมีคน มีคนสามคน คนหนึ่งกะนั่งอยู่เทิงโต่ะ เพื่อที่ว่าสิให้สั่งตัดผม มาตัดผมให้เจ้าของ คนยืนอยู่หั้นกะเป็นซ่างตัดผม ยืนอยู่หั้นกะเพื่อว่าสิตัดผมให้ลูกค้าเนาะ แล้วกะอีกคนหนึ่งนั่งอยู่เคาเต้อ อาดสิเป็นพะนักงานเก็บเงิน หลือว่าพะนักงานคิดเงินนั้นเอง

Basic vocabulary — Page 27 — Series B, pictures 13-15: cloud, sky, airplane, bird, to fly

13
อันนี้คืออี่หยัง อันนี้คือขี้ฝ้า หลือว่าก้อนเมกเนาะ
ขี้ฝ้านี้มันอยู่ใส ขี้ฝ้านี้มันอยู่เทิงฟ้า อยู่เทิงฟ้า ลอยโอ่งโล่งๆ อยู่เทิงฟ้าพุ้นหละ
แล้วขี้ฝ้าอยู่นำขี้ดินได้บ่ บ่ ขี้ฝ้าอยู่นำขี้ดินบ่ได้ ขี้ฝ้ามันต้องอยู่เทิงฟ้า อยู่เทิงสูงๆ อยู่เทิงอากาด
ขี้ฝ้ามันก้อนใหญ่บ่ กะใหญ่อยู่ บางก้อนกะก้อนบักใหญ่หนึ่ง บางก้อนกะก้อนน้อยๆ แล้วแต่มวนอากาดหลือว่าไอน้ำของมันเนาะ
ตอนนี้เฮาเห็นขี้ฝ้าอยู่จักก้อน ตอนนี้เห็นขี้ฝ้าอยู่สามก้อน กำลังลอยโอ่งโล่งๆ อยู่เทิงท้องฟ้าสูงๆ พุ้นหนะ

14
อันนี้คืออี่หยัง อันนี้คือเคี่ยงบิน
เคี่ยงบินลำใหญ่บ่ ลำใหญ่อยู่ ลำบักใหญ่หนึ่ง
เคี่ยงบินมีไว้เฮ็ดหญัง เคี่ยงบินกะมีไว้ถ้าขี่ มีไว้ถ้านั่งไปหั้นไปหนี้
เคี่ยงบินมันนั่งได้จักคน แล้วแต่ เป็นล้อยเป็นพันคนกะได้ แล้วแต่เคี่ยงบิน เคี่ยงใหญ่กะนั่งได้หลาย เคี่ยงน้อยกะนั่งได้หน้อย แล้วแต่เคี่ยงบินเนาะ
แล้วเคี่ยงบินมีคนขับคือลดบ่ กะมีคือกัน เคี่ยงบินกะมีคนขับคือลดคือลดไฟคือกัน
คนขับเคี่ยงบินหนิเขาเอิ้นว่าหญัง กะเอิ้นว่าคนขับเคี่ยงบิน หลือว่ากับตันเนาะ อันนี้กะเขาเอิ้นว่าคนขับเคี่ยงบินหลือว่ากับตัน
เคี่ยงบินมันสีอี่หยัง เคี่ยงบินสีซมพู สีซมพูอ่องต่องอยู่
แล้วเคี่ยงบินอยู่ใสตอนนี้ เคี่ยงบินกำลังบินอยู่เทิงท้องฟ้า บินอยู่สูงเติบ สูงบักคักหนึ่ง
แล้วเคี่ยงบินมันบินในน้ำได้บ่ บ่ เคี่ยงบินมันลงน้ำบ่ได้ มันต้องบินขึ้นฟ้า บินขึ้นสูงๆ พุ้นหนะ เพาะว่าเคี่ยงบินมันบ่แม่นเลีย

15
อันนี้คืออี่หยัง อันนี้เป็นนก อันนี้คือนกเนาะ
นกโตใหญ่บ่ บ่ นกโตบ่ใหญ่หลาย นกโตน้อยๆ หนึ่ง กำลังบินอยู่เทิงท้องฟ้า
นกมันโตสีหญัง นกมันโตสีเหลียง เหลียงเทิงโตเหลียงเทิงปีกของมันเอาโลด กำลังบินท่วนๆๆ อยู่เทิงฟ้าพุ้นหนะ
ตอนนี้มีนกจักโต มีนกอยู่โตเดียว นกโตเดียวกำลังบินอยู่โตเดียวข้อหล้อของมันนั้นหละ

Basic vocabulary — Page 26 — Series B, pictures 06-08: map, river

6
เขากำลังเฮ็ดหญัง กะมีพุซายคนหนึ่ง เขากำลังแนมเบิ่งแผนที่อยู่
เขาแนมเบิ่งแผนที่อี่หยัง อาดสิเป็นแผนที่เมียง แผนที่โลก ปะมานนั้นเนาะ กะมีพื้นที้ใหญ่เติบ หลือว่ากว้างเติบ หลือว่าแนมเบิ่งไปไกเติบ เขากะอาดสิแนมเบิ่งว่าหม้องนี้เมียงอี่หยัง หม้องนี้ปะเทดหญัง หม้องนี้จังหวัดหญัง อำเพอหญัง เขากะอาดสิแนมเบิ่ง
แล้วเขาแนมไปเพี่ยหญัง เขากะอาดสิสึกสาเกี่ยวกับพูมิพาก หลือว่าเกี่ยวกับปะเทดนั้นปะเทดนี้กะได้ เขากะเลยแนมเบิ่ง หลือว่าเขาอาดสิไปเที่ยว หลือว่าไปอาสัยอยู่หั้น ไปอาสัยอยู่นี้กะได้ เขากะเลยแนมเบิ่ง หลือว่าตวดสอบ หลือว่าสึกสาเบิ่งนั้นหละเนาะ ความหมายเนาะ

7
เขากำลังเฮ็ดหญัง กะมีพุซายพุหนึ่งคือเก่านั้นหละ เขากำลังแนมเบิ่งแผนที่อยู่
อันนี้เป็นแผนที่อี่หยัง เบิ่งลักสะนะแล้วหลือว่าเบิ่งซงแล้ว เป็นแผนที่แม่น้ำเนาะ หม้องนั้นเป็น คือสิมีแม่น้ำใหญ่ หลือว่าคองน้ำใหญ่เติบพอสมควน เขากะแนมไปหม้องนั้น
แล้วแผนที่นี้อยู่ใส อยู่หม้องใด กะจักหละเด้อ บ่ฮู้คือกันว่าแผนที่นี้อยู่ใส อยู่หม้องใด
แล้วพุซายคนนี้เขาเบิ่งเฮ็ดหญัง เขากะอาดสิสึกสาเกี่ยวกับหม้องนั้นหม้องนี้กะได้ เขากะเลยเบิ่ง หลือว่าเขาอาดสิไปเที่ยว หลือว่าเขาอาดสิเบิ่งแผนที่เพื่อที่สิเดินทางไปหม้องนั้นหม้องนี้ เขากะเลยเบิ่งกะได้

8
พุหญิงคนนี้เขากำลังเฮ็ดหญัง เขากะกำลังเบิ่งแผนที่ เป็นแผนที่ปะเทดหลือว่าเป็นแผนที่โลกเนาะ เบิ่งลักสะนะแล้ว
อยู่ในแผนที่นั้นกะสิมีแผนที่ปะเทดไทยพ้อม ปัดโทมีแผนที่ปะเทดไทยพ้อมตั๊วะนั้นหนะ
แล้วกะมีแผนที่ปะเทดอื่นพ้อม ปะเทดลาว ปะเทดพะม่า เวียดนาม มีเบิดซู่ปะเทด หลือว่าเอเซียนั้นเองเนาะ เป็นพูมิพากเอเซีย เป็นทะวีบเอเซียเนาะ
แล้วพุหญิงคนนี้เขาเบิ่งเฮ็ดหญัง กะบ่หมั้นใจคือกัน กะบ่แน่ใจว่าเขาเบิ่งเฮ็ดหญัง เขาอาดสิสึกสาเกี่ยวกับทะวีบเอเซีย หลือว่าทะวีบนั้นทะวีบนี้กะได้ แล้วปากดว่าตอนนี้เขากำลังเบิ่งทะวีบเอเซียอยู่นั้นเองเนาะ

Basic vocabulary — page 19 — Series B, pictures 15-17: house, village, town

15
อันนี้คืออี่หยัง อันนี้กะเป็นทัมมะซาด เป็นทุ่งหญ้า หลือป่าหญ้านั้นหละ
มีบ้านพ้อมบ่ มีอยู่ ในป่านี้กะสิมีบ้านหลังหนึ่ง เป็นบ้านไม้ มีบ้านหลังเดียวข้อหล้อ
แล้วมันมีพูเขาพ้อมบ่ กะมีอยู่ มีพูเขาพ้อม มีพูเขาหลายลูก หลือมีพูเขาหลายหม้องนั้นหละ
มีพูเขาใหญ่ มีพูเขาน้อย มีหลายคัก มีหลายอี่หลี
แล้วมีต้นไม้พ้อมแม่นบ่ แม่น มีต้นไม้พ้อม ต้นไม้กะหลายต้นอยู่ หลายต้นคัก
แล้วอยู่เทิงฟ้ากะมีก้อนเมกพ้อม มีก้อนเมก มีขี้ฝ้าลอยโอ่งโล่งๆ อยู่เทิงท้องฟ้านั้นหละ มีขี้ฝ้าหลายเติบ มีก้อนเมกหลายเติบ

16
นี้คืออี่หยัง อันนี้กะเป็นหมู่บ้าน เป็นหมู่บ้านหลายหลัง มีหมู่บ้านหลายหลัง หลือสี่หลังนั้นหละ หลือเฮากะแนมบ่เห็น อาดสิมีหลายกว่านั้นกะได้
เป็นบ้านไม้เทิงเบิด บ้านค้ายๆ กัน ลักสะนะคือๆ กัน ค้ายๆ กันนั้นหละ บ่แตกต่างจากกันคัก เบิ่งซงแล้วเป็นลักสะนะคือกัน
หมู่บ้านคืออี่หยัง หมู่บ้านกะคือหม้องที่อยู่อาสัยของคน เป็นหมู่บ้าน หลือเป็นจุดๆ ที่คนอาสัยอยู่หั้น ที่คนสามาดส้างบ้านอยู่หั้น หลือลวมกันหลายๆ คน หลือลวมกันหลายๆ หลัง เขากะสิเอิ้นหมู่บ้าน

17
อันนี้คืออี่หยัง อันนี้เป็นเมียง หลือเป็นเมียงหลวงนั้นหละ หลือเป็นเมียงใหญ่ๆ
เมียงนี้กะมีตึก มีตึก มีหญัง มีหอ มีหญังหลายอย่าง ที่เป็นก่อส้างจากตึก ที่เป็นก่อส้างจากอิด หลือก่อส้างจากปูน ที่บ่ได้เฮ็ดจากไม้ หลือที่บ่มีทัมมะซาด ก่อส้างจากปูน ที่แตกต่างจากทุ่งนา ทุ่งไฮ่ ทุ่งหญ้า ทุ่งไหล้
เขากะสิเอิ้นว่าเป็นเมียง ที่มีความจะเลิน ที่แตกต่างจากบ้านนอก หลือจากไฮ่จากนาเฮา
แล้วในเมียงคนหลายบ่ กะหลายอยู่ ในเมียงคนกะหลายคัก หลายคักอี่หลี คนกะมาแออัด มาอาสัยอยู่ในเมียงหลวง หลือในเมียงเมียงนั้น
เพาะว่ามันมีความจะเลิน คนกะอยากมาหม้องที่มันมีความจะเลิน บ่อยากอยู่บ้านนอก บ่อยากอาสัยอยู่บ้านนอก กะอยากอยู่ในเมียง บ่อยากอยู่บ้านนอก อยากมาอยู่ในเมียง อยากอยู่ในความจะเลิน

Basic vocabulary — Page 27 — Series B, pictures 01-03: tuk tuk, driver, passenger

1
อันนี้คืออี่หยัง อันนี้เป็นลดสามล้อ หลือว่าลดตุ่กตุ่ก
ลดสามล้อหนิ[กับ]ลดตุ่กตุ่กคือกันบ่ กะค้ายๆ กันหนิหละ กะคือกันอยู่ บ่แตกต่างกันหลาย ใซ้งานได้คือกัน
แล้วลดตุ่กตุ่กกับลดสามล้อหนิใซ้งานจั่งใด กะเอาไว้ถ้าขับ กะเอาไว้ถ้าขี่ไปหนั้นไปหนี้ คือกันกับลดใหญ่ คือกันกับลดพิกอั่บหนั้นหละ แต่ว่ามันขี่ได้เล็วบ่หลาย ขี่ได้ซ้าๆ ขี่ได้ส่ำกับลดมอเตอไซหลือว่าซ้ากว่ามอเตอไซอยู่ แต่ว่าขี่ได้บ่เล็วหลาย แต่ว่าสามาดขี่ไปหนั้นไปหนี้ได้ สะดวกคือกัน ส่ำลดใหญ่หนั้นหละเนาะ
แล้วอยู่ในกุงเทบกะมีลดตุ่กตุ่กหลายคือกัน เอามาใซ้เป็นยานพาหะนะหลือว่าลดลับส่งนั้นเอง ค้ายๆ กับลดแท็กซี้เนาะ ใซ้งานคือกันกับลดแท็กซี้ แบบว่า ลับพุโดยสานไปส่งหม้องหั้นหม้องหนี้ กะค้ายๆ กับลดแท็กซี้

2
เขากำลังเฮ็ดหญัง กะมีพุซายพุหนึ่ง เขากำลังขับลดตุ่กตุ่กหลือว่าลดสามล้ออยู่
เขาสิขับลดอันนี้ไปใส กะบ่ฮู้คือกัน อาดสิขับไปตะหลาดตะลี หลือว่าไปซื้อของกะได้
แต่ว่าในบางเที่ย ขั้นพุซายคนนี้ขับลดตุ่กตุ่ก หลือว่าเขาสิเป็นคนขับตุ่กตุ่กลับจ้าง เขากะอาดสิไปลับพุโดยสาน หลือว่าไปหม้องหั้นไปหม้องหนี้ เพื่อที่สิไปลับไปหาพุโดยสานนั้นเองเนาะ

3
เขากำลังเฮ็ดหญัง กะมีพุซายพุหนึ่ง กำลังขับลดตุ่กตุ่กอยู่หนั้นหละ
แล้วเขาสิขับไปใส จักคือกัน บ่ฮู้ว่าเขาสิขับไปใส แต่ว่าตอนนี้แนมเห็นคนสองคนอยู่ข้างหลังของเขา หลือว่าเขากำลังบันทุกพุโดยสาน ไปส่งหม้องหนั้นหม้องหนี้ อาดสิไปส่งพุโดยสานกะได้ เพาะว่าเห็นพุหญิงกับพุซายสองคนนั่งอยู่ข้างหลัง
แล้วลดตุ่กตุ่กนี้มันบันจุคนได้หลายคนบ่ หลือว่าคนไปนั่งเทิงลดตุ่กตุ่กหนิได้หลายคนบ่ กะบ่หลายปานใด คนกะนั่งอยู่เทิงลดตุ่กตุ่กได้บ่ส่ำลดเก็งหลือว่าบ่ส่ำลดพิกอั่บเนาะ เพาะว่าพื้นที้มันบ่หลาย มีพื้นที้น้อยๆ หนึ่ง เพาะว่าลดตุ่กตุ่กมันกะมีแค่สามล้อ หม้องนั่งนี้กะสิมีหม้องนั่งคนขับแล้วกะหม้องนั่งพุซ้อนนั้นเอง กะคือได้ปะมานสองสามคน สี่คน ปะมานนั้น อย่างหลายเนาะ

Basic vocabulary — Page 23 — Series B, pictures 18-20: money, bank, ATM

18
นี้คืออี่หยัง อันนี้เป็นเงิน
อันนี้กะเป็นเงินนั้นหละ หลายบาทซ้ำแมะ วางท้อนกันอยู่หั้น
เทิงมีใบพ้อม เทิงมีเหลียนพ้อม ใบกะหลายใบเอาโลด
แล้ววางท้อนกันอยู่หั้นมีจักบาท กะมีหลายบาทอยู่ อาดสิมีหลายบาทคักอยู่ แนมไปนั้นหลายบาทเติบ เทิงใบเทิงเหลียนเอาโลด
เงินนี้เอาไว้เฮ็ดหญัง กะสามาดใซ้ได้หลายอย่าง เอาซื้อนั้นซื้อนี้ซื้ออี่หยังกะได้ที่เฮาอยากได้
ขั้นเฮามีเงิน เฮาอยากได้อี่หยัง เฮากะไปซื้อได้ ขั้นเฮาบ่มีเงิน เฮาอยากได้อี่หยัง เฮากะบ่สามาดสิซื้อได้ เพาะว่า เฮาบ่มีเงินที่ซื้อเขา [=ซื้อของเขา] เฮากะบ่สามาดที่สิได้ของสิ่งนั้นมา

19
นี้คืออี่หยัง อันนี้กะเป็นทะนาคาน
แล้วทะนาคานนี้เอาไว้เฮ็ดหญัง ทะนาคานนี้กะมีปะโยดหลายอย่าง เฮาสิสามาดไปเฮ็ดอี่หยังอยู่ในทะนาคานกะได้ อย่างเซ้นว่า ไปฝากเงิน ไปทอนเงิน หลือว่าไปโอนเงิน เฮ็ดอี่หยังที่เกี่ยวกับเงิน หลือว่าไปสามาดกู้เงินกะได้ ไปเฮ็ดอี่หยังที่เกี่ยวกับเงินต่างๆ เฮากะสามาดที่สิไปทะนาคานนี้ได้
แล้วทะนาคานนี้มีหลายหม้องบ่ กะมีหลายหม้องอยู่ ทะนาคานนี้กะสิมีตั้งอยู่ซู่หม้องเอาโลด อาดสิมีอยู่ทุกอำเพอ หลือว่าทุกตำบนกะได้ เพาะว่าทะนาคานมันสิไปตั้งไว้อยู่ซู่หม้องเอาโลด

20
นี้คืออี่หยัง อันนี้กะเป็นตู้เอทีเอ็ม
เป็นตู้ไว้ถ้ากดเงิน หลือว่าฝากเงิน หลือว่าโอนเงินกะได้
ญามเฮาสิไปฝากเงินให้คนอื่น หลือว่าฝากเงินใส่บันชีทะนาคานของเฮา เฮากะเอาเงินใส่ไปในตู้นี้ หลือว่ากดนั้นกดนี้ แล้วกะเอาเงินใส่ไป มันกะสิฝากเงินหลือว่าโอนเงินไป
บางเที่ยเฮาอยากได้เงินสด เฮาบ่มีเงินสด เฮากะสิเอาบัดสอดเข้าไปในตู้นี้ แล้วเฮากะกดนั้นกดนี้ แล้วเงินสดกะสิออกมา
แต่ว่าเฮาต้องมีเงินในบัดพ้อมเด๊ บัดทะนาคานนั้นหละ ขั้นเฮาบ่มีเงินในบัด เฮาไปกด เงินกะบ่ออกมา
แล้วตู้เอทีเอ็มนี้มีหลายบ่ กะมีหลายอยู่ ตั้งอยู่ซู่มุมซู่แกเอาโลด จักว่าอยู่ตำบนใดแน่ บ้านใดแน่ อำเพอใดแน่ มีอยู่ซู่หม้องซู่แก ตั้งอยู่ซู่มุมซู่ทิดเอาโลด

Basic vocabulary — page 12 — Series B, pictures 01-05: alarm clock, to sleep, to get up

1
นี้คืออี่หยัง นี้คือนาลิกาปุก
นาลิกาปุกมีไว้เฮ็ดหญัง นาลิกาปุกมีไว้ถ้าปุก นาลิกาปุกซ่อยให้คนตื่นญามมื้อเซ้าได้
เขาตั้งนาลิกาปุกจักโมง เขาตั้งนาลิกาปุกเจ็ดโมงห้าสิบเก้านาที
เจ็ดโมงห้าสิบเก้านาทีเป็นญามเซ้าแม่นบ่ แม่น เจ็ดโมงห้าสิบเก้านาทีเป็นญามเซ้า
เป็นหญังเขาคือตั้งปุกญามมื้อเซ้า เพาะว่าเขาอาดสิไปเฮ็ดงาน หลือสิไปโลงเลียนกะได้ เขากะเลยปุกญามมื้อเซ้า เพื่อที่สิให้ตื่น สิให้ตื่นไปทันเวลา
นาลิกาปุกต้องตั้งเวลาบ่ ตั้งอยู่ ขั้นเฮาอยากตื่นญามใด เฮากะตั้งเวลาปุกญามนั้น
ขั้นอยากตื่นญามเที่ยง เฮากะตั้งนาลิกาปุกญามเที่ยง ขั้นอยากตื่นญามเซ้า เฮากะตั้งนาลิกาปุกญามมื้อเซ้า

2
นาลิกาปุกมันเป็นอี่หยัง นาลิกาปุกมันกำลังปุก
มันปุกตอนจักโมง มันปุกตอนสองโมงเซ้า ตอนแปดนาลิกามันดังขึ้น
เพาะว่าเขาตั้งนาลิกาปุกตอนสองโมงเซ้า พอฮอดสองโมงเซ้าแล้ว นาลิกาปุกมันกะสิดังขึ้น มันกะสิดังบักแฮงหนึ่ง เสียงดังบักคัก เฮ็ดให้เสียงดังๆ
เพาะว่าคนกำลังนอนหลับ ขั้นได้ญินเสียงนาลิกาปุกดังๆ คนกะสิตื่น กะสิตื่นขึ้นเลย

3
เขากำลังเฮ็ดหญัง เขากำลังนอนหลับ
เขานอนหลับอยู่ใส เขานอนหลับอยู่ในห้องนอน
ห้องนอนของพุใด จักคือกัน ห้องนอนนี้กะอาดสิเป็นห้องนอนของเขา เขากะเลยนอนหลับอยู่หั้น เขานอนอยู่เทิงเตียงนอน
ข้างเตียงนอนของเขามีโต่ะนอนพ้อม มีโต่ะน้อยๆ โต่ะสีเหลียง
อยู่เทิงโต่ะของเขากะมีนาลิกาปุกพ้อม ในโต่ะนั้นกะมีลิ้นชักพ้อม ลิ้นชักมีสามอัน
ตอนนี้เขากำลังนอนหลับ นอนหลับเป็นตาแซบ นอนหลับเป็นตามีแฮง
เขาเอาหัวของเขาหมุนอยู่เทิงหมอน แล้วเขากะผ้าห่มห่มโตของเขา นอนเป็นตาแซบหลาย เป็นตามีแฮงบักคักหนึ่ง

4
เขากำลังเฮ็ดหญัง เขากำลังสิตื่น
เป็นหญังเขาคือสิตื่น เขาได้ญินเสียงนาลิกาปุก
เขาตั้งนาลิกาปุกไว้ มันฮอดเวลาปุกแล้ว นาลิกาปุกมันกะเลยดังขึ้น
พอเขาได้ญิน กะเฮ็ดให้เขาตื่น เพาะว่านาลิกาปุกมันเสียงดังหลาย มันเสียงดังบักคัก กะเลยเฮ็ดให้เขาตื่น เฮ็ดให้เขาตื่นนอน

5
เขากำลังเฮ็ดหญัง เขากำลังตื่นนอน
พุซายคนนี้เขาตื่นนอนแล้ว เขาลุกขึ้นมาจากเตียงแล้ว
แล้วเขาสิญ่างไปใส เขาสิเฮ็ดอี่หยังต่อไป กะบ่ลู้คือกัน
เขาลุกขึ้นมาจากเตียงแล้ว เขาบ่ได้ใส่เกิบเลย เขากำลังสิญ่างไป
จักสิญ่างไปใส เขาอาดสิฟ้าวไปอาบน้ำ อาดสิไปเฮ็ดงานหลืออาดสิไปโลงเลียนกะได้

Basic vocabulary — page 06 — Series B, pictures 10-13: daytime, sun, cloud, rain, lightning

10
นี้คืออี่หยัง นี้คืออากาดญามมื้อเว็น
อากาดญามมื้อเว็นเป็นแบบใด อากาดญามมื้อเว็นมันสิแก่งจ่างป่าง
มันสิมีตะเว็นบ่ มีอยู่ ท้องฟ้าญามมื้อเว็นมันสิมีตะเว็นพ้อม
ตะเว็นสีอี่หยัง ตะเว็นสีเหลียง
ตะเว็นน่วยใหญ่บ่ ใหญ่อยู่ ตะเว็นน่วยบักใหญ่
ท้องฟ้าสีอี่หยัง ท้องฟ้าสีฟ้า
ท้องฟ้ามันใหญ่บ่ ใหญ่อยู่ ท้องฟ้ามันสิใหญ่ มันสิกว้าง
มีบ้านคนบ่ มีอยู่
มีบ้านคนจักหลัง มีบ้านคนสามหลัง
บ้านหลังใหญ่บ่ ใหญ่อยู่ แต่บ่ใหญ่หลาย
มีพูเขาบ่ มีอยู่ มีพูเขาอยู่
มีต้นไม้บ่ มีต้นไม้อยู่
มีหญ้าบ่ มีหญ้าอยู่
หญ้ามันหลายบ่ หญ้ามันหลายอยู่ หญ้ามันหลายบักคัก
หญ้ามันเกิดอยู่ใส หญ้ามันเกิดอยู่นำพื้นดิน

11
นี้คืออี่หยัง นี้คือท้องฟ้าญามมื้อเว็น
ตอนนี้ท้องฟ้าญามมื้อเว็นมีอี่หยังแน่ ตอนนี้มีแต่ขี้ฝ้า
ขี้ฝ้ามีหลายบ่ ขี้ฝ้ามีหลายอยู่ ขี้ฝ้ามันมีเต็มท้องฟ้าอยู่
ขี้ฝ้าสีอี่หยัง ขี้ฝ้าสีขาว
ตอนนี้มีตะเว็นบ่ บ่ ตอนนี้บ่มีตะเว็น ตอนนี้แนมบ่เห็นตะเว็น จักตะเว็นไปทางใด

12
ตอนนี้ท้องฟ้ากำลังเป็นหญัง ตอนนี้ฝนมันกำลังตก
ฝนมันตกมาแต่ใส ฝนมันตกมาแต่เทิงท้องฟ้า
ตอนนี้ท้องฟ้าสีอี่หยัง ตอนนี้ท้องฟ้าสีคึ้มๆ ค้ายๆ สีดำ
ฝนตกแฮงบ่ แฮงอยู่ ฝนตกแฮงหลาย
ฝนมันตกมาแต่ใส ฝนมันตกมาแต่เทิงฟ้า
ฝนตกมาแล้วมันสิไปใส มันสิลงไปหาขี้ดิน
มันไปขี้ดินแล้วมันสิไหลไปใส บ่ลู้คือกันว่ามันสิไปใส
หม้องใดค้อย น้ำมันกะสิไหลไปหม้องหั้น
ฝนตกลงมาแล้ว น้ำอยู่ขี้ดินมันสิมีหลายบ่ หลายอยู่ ขั้นฝนตกลงมาแล้ว น้ำอยู่ขี้ดินกะสิมีหลาย
ตอนนี้ขี้ฝ้าสีอี่หยัง ตอนนี้ขี้ฝ้าสีดำ ขี้ฝ้าบ่ได้สีขาว
ขั้นฝนเซาตกแล้ว ขี้ฝ้ากะสิเป็นสีขาวคือเก่า ขี้ฝ้ากะสิบ่สีดำ

13
ท้องฟ้ากำลังเป็นหญัง ตอนนี้ท้องฟ้ากำลังฝนตก
ฝนตกแฮงบ่ แฮงอยู่ ฝนตกแฮงหลาย
ตอนนี้มีฟ้าผ่าบ่ มีอยู่ มีฟ้าผ่า
ฟ้าผ่าแฮงบ่ แฮงอยู่ ฟ้าผ่าแฮงบักคัก
ฟ้าผ่าสีอี่หยัง ฟ้าผ่าสีเหลียง
ฟ้าผ่ามาแต่ใส ฟ้ามันสิผ่ามาแต่เทิงฟ้า
ฟ้าผ่าเสียงดังบ่ เสียงดังอยู่ ฟ้าผ่ามันผ่ามันสิเสียงดังคัก
ฟ้าผ่าตาย้านบ่ ตาย้านอยู่ ตาย้านบักคัก
ขั้นฟ้าผ่า คนสิญ่างไปหาฟ้าผ่าได้บ่ บ่ คนญ่างไปบ่ได้ เพาะว่ามันตาย้านหลาย
ขั้นคนยืนอยู่ใก้ๆ ฟ้าผ่า คนอาดสิตายได้ เพาะว่ามันตาย้านหลาย มันตาย้านบักคัก

Basic vocabulary — page 18 — Series B, pictures 11-13: house, roof, stairs

11
นี้คือหญัง นี้คือบ้าน อันนี้เป็นบ้าน
อันนี้เป็นบ้านคน บ้านคนอยู่ ที่อยู่อาสัยของคนนี้หละ
เป็นบ้านเฮียนไทย บ้านไทย หลือเป็นบ้านไม้นั้นหละ
คนอี่สานสิเอิ้นว่าบ้านไม้ แต่ว่าคนพากกางหลือคนไทยเขาสิเอิ้นบ้านเฮียนไทย บ้านเลียนไทยนั้นหละ
บ้านหลังนี้มันตั้งอยู่ใส บ้านหลังนี้มันตั้งอยู่ใสกะบ่ฮู้ อันนี้กะบ่ฮู้คือกัน จักว่าเขาตั้งอยู่ใส
แต่ว่าคนสิอยู่ใส กะไปส้างบ้านไว้หั้น คนอยากอยู่ใส เขากะไปส้างบ้านไว้หั้น แล้วแต่คนสิไปเฮ็ดสิไปส้างอยู่หั้น
แล้วแต่ บางคนอยากไปอยู่ใส บางคนอยากไปอยู่ใส เขากะไปส้างไว้หั้น
แล้วแต่คน แล้วแต่ที่ดินคน มีที่ดินอยู่ใส กะไปส้างบ้านไว้หั้น
บ้านหลังนี้หลือเฮียนหลังนี้เฮ็ดมาจากอี่หยัง บ้านหลังนี้เป็นบ้านไม้ กะต้องเฮ็ดมาจากไม้ ขั้นบ้านปูน จั่งเฮ็ดมาจากปูน
เป็นหญังบ้านหลังนี้คือสูงแท้ อันนี้กะบ่ฮู้คือกัน แล้วแต่บ้าน แล้วแต่คน แล้วแต่คนสิส้างสิเฮ็ด เพาะว่าอยากให้บ้านสูง กะเฮ็ดเสาสูงๆ อยากให้บ้านต่ำ กะเฮ็ดเสาไว้ต่ำๆ
แต่ว่าบ้านหลังนี้มันสูง เพาะว่าเขาเฮ็ดหลักเสาสูง บ้านหลังนี้มันกะเลยสูง

12
นี้คืออี่หยัง นี้คือหลังคา อันนี้เป็นหลังคาบ้าน หลือหลังคาเฮียนนั้นหละ
หลังคาบ้านนี้เฮ็ดมาจากอี่หยัง กะเฮ็ดมาจากหลังกะสี เฮ็ดมาจากไม้ เฮ็ดมาจากอี่หยังกะได้ ที่มันสามาดทนแดดทนฝนได้ ที่มันสามาดกันลมได้พ้อม
หลังคาอันนี้มีไว้เฮ็ดหญัง หลังคาอันนี้กะมีปะโยดหลาย สำคันคัก สำคันอี่หลี
ขั้นบ่มีหลังคากะบ่แม่นบ้าน เพาะสะนั้นแล้วหลังคาอันนี้กะมีไว้ถ้ากันแดด มีไว้ถ้ากันฝน มีไว้ถ้ากันลมพ้อม
สามาดป้องกันได้ทุกสิ่งทุกอย่าง ขั้นบ้านบ่มีหลังคือ เขากะบ่เอิ้นว่าบ้าน เพาะสะนั้นแล้วทุกบ้านทุกหลังทุกเฮียนต้องมีหลังคา

13
นี้คืออี่หยัง นี้คือบันไดบ้าน นี้คือบันไดเฮียน
บันไดอันนี้เฮ็ดมาจากอี่หยัง บันไดอันนี้กะเฮ็ดมาจากไม้ เฮ็ดมาจากปูนกะได้ แต่ว่าขั้นอันนี้เป็นบ้านไม้ กะต้องเฮ็ดมาจากไม้ ขั้นเป็นบ้านปูน กะเฮ็ดมาจากปูน แล้วแต่บ้าน แล้วแต่หลังเนาะ
บันไดอันนี้มีจักซั้น อันนี้กะบ่ฮู้คือกัน จักว่าบันไดอันนี้มีจักซั้น หลือจักขั้นเนาะ
บ่ได้ไปนับเบิ่ง แต่ว่าเบิ่งแล้ว แนมแล้ว บันไดอันนี้กะสูงเติบ สูงบักคักหนึ่ง กะสิมีหลายซั้น อาดสิมีสิบกว่าซั้นขึ้นไป หลือหลายกว่านั้นกะได้ แล้วแต่ลักสะนะบ้าน แล้วแต่ลักสะนะเฮียน

Basic vocabulary — page 19 — Series B, pictures 18-20: no, watermelon, soft drink, to play ball

18
พุหญิงเขากำลังเฮ็ดหญัง เขากำลังซวนพุซายกินบักแตงโมอยู่
แล้วเขาซวนพุซายว่าจั่งใด อันนี้กะบ่ฮู้คือกัน จักว่าเขาซวนพุซายจั่งใด เขาอาดสิซวนว่า กินบักแตงโมบ่ กินบักแตงโมนำเฮาบ่
แล้วพุซายตอบว่าจั่งใด พอพุซายได้ญินนั้น อันนี้กะบ่ฮู้คือกัน เห็นแต่เคี้ยงหมายกากะบาด เขาอาดสิบ่กิน หลืออาดสิส่ายหน้า เขาอาดสิตอบว่า บ่ บ่กินดอก บ่เป็นหญัง เขากะอาดสิเว้าปะมานนี้
อันนี้เป็นผนละไม้อี่หยังเกาะ ที่เขาซวนพุซายกิน เป็นบักแตงโม เป็นแตงโม
แตงโมมีลดซาดจั่งใด แตงโมกะมีลดซาดหวาน หวานคัก แต่ว่าบ่หวานหลายดอก แต่ว่ากะแซบ คนส่วนมากสิมักกินแตงโม
แตงโมมีในบ่ กะมีอยู่ แตงโมมีในพ้อม มันมีในหลาย แตงโมมันมีในอยู่ในน่วยของมันนั้นหละ
เป็นหญังพุซายคนนี้เขาคือบ่กินแตงโมนำพุหญิง เขาอาดสิบ่หิว หลืออาดสิบ่อยาก เขากะเลยบ่กิน เขาอาดสิบ่มักกะได้ เขากะเลยปะติเสด เขากะเลยบ่เอา เขากะเลยบ่กินนำพุหญิงคนนี้

19
นี้คืออี่หยัง อันนี้กะเป็นพุหญิงคนเก่านั้นหละ เขากำลังซวนพุซายกินน้ำอัดลมอยู่
เป็นหญังเขาคือซวนพุซายกินน้ำอัดลมขวดนี้ อันนี้กะบ่ฮู้คือกัน เขาอาดสิมัก หลืออยากให้คนนี้กินนำกะได้ เขากะเลยซวนกิน
เขากะอาดสิซวนว่า กินน้ำอัดลมนำเฮาบ่ กินน้ำอันนี้นำเฮาบ่ เขากะอาดสิซวนปะมานนี้
น้ำที่เขาซวน หลือสิให้พุซายกินนี้ เป็นน้ำอี่หยังเกาะ กะเป็นน้ำอัดลม เป็นน้ำกะปอง เป็นน้ำกะปองอัดลมนี้หละ
น้ำกะปองอัดลมนี้มีลดซาดจั่งใด น้ำกะปองอัดลมนี้กะมีลดซาดหวาน หลือลดซาดซ้า เป็นน้ำที่ซ้า แล้วกะเฮ็ดให้สดซื้นขั้นเฮากินแล้ว
เป็นหญังพุซายคนนี้เขาคือบ่กินน้ำนำพุหญิงคนนี้ เขากะอาดสิบ่มัก หลืออาดสิบ่มักกินน้ำอัดลมอันนี้ เขากะเลยบ่กิน เขากะเลยปะติเสดกะได้

20
เขากำลังเฮ็ดหญังอยู่ กะมีพุหญิงคนหนึ่ง เขากำลังซวนพุซายเหล้นลูกบอนอยู่
เขาอาดสิซวนไปว่า เหล้นลูกบอนบ่ เหล้นลูกบอนนำเฮาบ่ มาเหล้นลูกบอนนำเฮาบ่
ของที่เขาถืออยู่หั้นเป็นลูกบอนหลือเป็นอี่หยังเกาะ กะเป็นลูกบอนนั้นหละ เป็นลูกบอนลูกวงกม น่วยบ่ใหญ่หลาย น่วยพอดี เขากำลังจับอยู่
ลูกบอนอันนี้ใซ้เหล้นจั่งใด ลูกบอนอันนี้กะใซ้เหล้น เอาไว้ถ้าเตะ เอาไว้ถ้าตี เอาไว้ถ้าโญน เอาไว้ถ้าเหล้นจั่งใดกะได้ แล้วแต่เฮาสามาดสิเหล้น
เป็นหญังพุซายคนนี้คือบ่เหล้นลูกบอนกับพุหญิงคนนี้ เขากะอาดสิบ่มัก หลือเหล้นบ่เป็น หลือบ่อยากเหล้นกะได้ หลือบ่มีอาลมเหล้นกะได้ เขากะเลยบ่เหล้น เขากะเลยปะติเสดพุหญิงคนนี้ไป

Basic vocabulary — Page 26 — Series B, pictures 01-05: monk, to good to receive food offerings, Buddha statue, temple, stupa

1
อันนี้เพิ่นเป็นพุใด เพิ่นเป็นพะ
เป็นหญังคือเอิ้นว่าพะ เป็นหญังคือเป็นพะ กะเพิ่นบวดแล้ว เพิ่นบวด กะเลยเอิ้นว่าพะ
กานเอิ้นกะสิมีสองแบบ ขั้นพุซายบวด สิเอิ้นว่าพะ ขั้นพุหญิงบวด หลือว่าแม่หญิงบวด สิเอิ้นว่าแม่ซี แต่ว่าอันนี้เพิ่นเป็นพุซาย กะเลยเอิ้นว่าพะ
พะเพิ่นใส่ซุดสีหญัง พะเพิ่นกะใส่แต่สีเดียว สีเหลียงหลือว่าสีส้มส่ำนั้นหละ บ่ให้ใส่สีอื่น สีแดง สีซมพู สีดำ เพิ่นบ่ให้ใส่ ให้ใส่แค่สีเดียว

2
พะเพิ่นกำลังเฮ็ดหญัง พะเพิ่นกำลังสิบินทะบาด พะเพิ่นกำลังสิไปบินทะบาด
บินทะบาดอยู่ใส กะอาดสิไปบินทะบาดลอบบ้าน หลือว่าอ้อมหมู่บ้านหนั้นหละ หม้องใดมีพุคน หลือว่ามีคนอยู่หนั้น เพิ่นกะสิไปบินทะบาดอยู่หั้น
ขั้นบ้านใดสิใส่บาด เพิ่นกะไปบ้านนั้น ขั้นบ้านใดบ่ใส่ เพิ่นกะญ่างผ่านไป
กานบินทะบาดของพะนี้กะสิไปแค่มื้อละเที่ย ไปแต่ญามเซ้า ตื่นขึ้นหกโมง ทำวัดอี่หยังเส็ด กะไปบินทะบาดญามมื้อเซ้า
แล้วญามเที่ยงพะสิออกไปบินทะบาดบ่ บ่ บ่ไป พะสิบินทะบาดเที่ยเดียว ญามเที่ยงญามแลงบ่บินทะบาดเนาะ

3
อันนี้คืออี่หยัง อันนี้กะเป็นพะพุดทะลูบ เป็นพะพุดทะลูบตั้งอยู่
พะพุดทะลูบเอาไว้เฮ็ดหญัง พะพุดทะลูบกะเอาไว้ถ้ากาบไหว้ เป็นที่กาบไหว้ของพุคน พุคนสิมักมากาบมาไหว้อยู่หม้องนี้ หลือว่าพุใดอยู่ใก้ อยู่แถวๆ นี้ กะสิมาไหว้พะพุดทะลูบอยู่หม้องนี้
พะพุดทะลูบนี้มีซีวิดบ่ บ่ พะพุดทะลูบบ่มีซีวิด เป็นสิ่งที่เฮ็ดขึ้นมา ปั่นขึ้นมา เพื่อให้เป็นสิ่งที่คนเคาลบหลือว่ากาบไหว้หนั้นหละ

4
อันนี้คืออี่หยัง อันนี้เป็นสาลา เป็นสาลาวัด หลือว่าสาลาปะเลียนนั้นหละ
พะอาดสิมาสันเข้า หลือว่าสันเข้าเซ้า สันเพน หลือว่าจำวัด จำสีนวัด กะเฮ็ดอยู่หม้องนี้เบิดซู่อย่าง อาดสิมีกิดจะกัม ชาวบ้านอี่หยังมาเฮ็ด กะอาดสิมาเฮ็ดกิดจะกัมอยู่นี้ เกี่ยวกับวัด เกี่ยวกับสาสะนา หลือว่าพะทัมเนาะ สิสามาดมาเฮ็ดได้อยู่หม้องนี้
แล้วสาลานี้ตั้งอยู่ใส สาลานี้กะตั้งอยู่ในวัด ส้างขึ้นอยู่ในวัด

5
อันนี้คืออี่หยัง อันนี้เอิ้นว่าเจดี หลือว่าพะทาดเจดีนั้นหละ แล้วแต่คนสิเอิ้น แล้วแต่คนสิเว้า
พะทาดหลือว่าเจดีนี้เฮ็ดมาจากอี่หยัง บางหม้องกะเฮ็ดมาจากดิน บางหม้องกะเฮ็ดมาจากปูน บางหม้องเฮ็ดมาจากเหล็กจากไม้ แล้วแต่สิเฮ็ด แล้วแต่คนสิคิดเฮ็ดว่า เฮ็ดแบบใด เฮ็ดจั่งใด เฮ็ดเพี่ยอี่หยัง ปะมานนั้นเนาะ
แล้วพะทาดหลือว่าเจดีนี้เป็นสิ่งสักสิดบ่ หลือว่าคนเคาลบ คนไหว้ คนกาบ คนหญังบ่ กะมีส่วนอยู่ บางเจดีกะเฮ็ดเพื่อให้คนเคาลบหลือว่านับถือ บางเจดีกะเฮ็ดเป็นหม้องที่ใส่กะดูกคนที่ตายไปแล้ว หลือว่ากะดูกของพะพุดทะเจ้า หลือว่ากะดูกของพะของคนที่ตายไปแล้วหนั้นหละ

Basic vocabulary — page 18 — Series B, pictures 14-17: motorbike, petrol gauge, petrol station

14
นี้คืออี่หยัง นี้คือมอเตอไซ
มอเตอไซอันนี้เอาไว้ถ้าเฮ็ดหญัง เอาไว้ถ้าขี่ เอาไว้ถ้าขับนั้นหนะ เอาไว้ถ้าเดินทาง เอาไว้ถ้าขี่ไปข้างหน้า
มอเตอไซคันนี้นั่งได้จักคน กะนั่งได้หลายคนอยู่ นั่งได้สองคน สามคน สี่คนกะได้ แล้วแต่สิอัดกันไป แล้วแต่สินั่ง แล้วแต่สิขี่
มอเตอไซคันนี้มีสีอี่หยัง มอเตอไซคันนี้มีสีซมพู
ลดมอเตอไซต้องคือกันเบิดบ่ บ่ ลดมอเตอไซบ่คือกัน แล้วแต่ลุ้น แล้วแต่ยี่ห้อ
บางลุ้นกะสีส้ม บางลุ้นกะสีดำ บางลุ้นกะสีขาว บางลุ้นกะสีแดง แล้วแต่ยี่ห้อ แล้วแต่ลุ้นมัน
มอเตอไซแต่ละคันมีส่วนปะกอบบ่ กะมีอยู่ มอเตอไซกะมีส่วนปะกอบหลายอย่าง
แต่ละอย่างกะแตกต่างกันออกไป มอเตอไซกะมีล้อพ้อม ล้อเอาไว้ถ้าหมุน เอาไว้ถ้าแล่นไปข้างหน้า
เบกมอเตอไซกะเอาไว้ถ้าเบก ญามขี่เล็วๆ หลือมีเหดอี่หยังกะต้องเบก
มอเตอไซกะมีกะจกพ้อม มีไฟพ้อม กะจกเอาไว้ถ้าแญง เอาไว้ถ้าแญงส่องไปทางหลัง ไฟกะเอาไว้ถ้าส่องไฟ หลือแญงไฟไปข้างหน้า
ส่วนปะกอบของมอเตอไซกะมีอีกหลายสิ่งหลายอย่าง เฮากะบ่สามาดเอ่ยถึงได้ไปอีกเนาะ

15
นี้คืออี่หยัง นี้คือเกน้ำมัน เป็นเกบอกน้ำมัน หลือเป็นแนวบอกน้ำมันนั้นหละ ว่าน้ำมันเฮามีบ่ ว่าน้ำมันเฮามีบ่ หลือหลายปานใด หลือน้อยปานใด เฮากะสามาดเบิ่งอยู่หม้องนี้ได้
ตอนนี้ลดคันนี้มีน้ำมันบ่ บ่ ตอนนี้ลดคันนี้บ่มีน้ำมันเลย
ขั้นลดมีน้ำมัน เข็มอันนี้กะต้องหมุนไปทางขวา หลืออยู่ฝั่งขวามือ
เพาะสะนั้นแล้ว ลดคันนี้บ่มีน้ำมัน มันจั่งหมุนมาทางซ้าย
ขั้นลดคันนี้บ่มีน้ำมัน เขาต้องเฮ็ดจั่งใด เขากะต้องไปเติมน้ำมัน ไปเติมน้ำมันอยู่ปั้มน้ำมัน หลืออยู่หม้องที่มันมีขายน้ำมัน

16
นี้คืออี่หยัง นี้คือปั้มน้ำมัน หลือถังน้ำมัน เป็นปั้มน้ำมันนั้นหละ
ปั้มน้ำมันอันนี้เอาไว้เฮ็ดหญัง เอาไว้ถ้าเติมน้ำมัน พุใดอยากเติมน้ำมัน กะสามาดมาเติมอยู่หม้องนี้ได้
ลดคันใดๆ อยากเติมน้ำมัน กะต้องมาเติมอยู่หนี้
ลดใหญ่ หลือลดน้อย กะซ่าง ต้องมาเติมอยู่หนี้
ปั้มน้ำมันกะมีหลายที่หลายหม้อง อยู่หม้องนั้นกะมี อยู่หม้องนี้กะมี แล้วแต่ ขั้นอยู่หม้องนั้นมีถะหนนใหญ่ๆ หลือลดผ่านหลายๆ เขากะสิเฮ็ดปั้มน้ำมันไว้หั้น

17
เขากำลังเฮ็ดหญัง เขากำลังเติมน้ำมัน
อันนี้เป็นพะนักงาน เขากำลังเติมน้ำมันให้ลดมอเตอไซคันนี้อยู่
เป็นหญังเขาคือเติมน้ำมัน กะเพาะว่าลดคันนี้บ่มีน้ำมัน เขากะเลยเติมน้ำมัน เพื่อที่สิให้ลดคันนี้แล่นได้ หลือขี่ไปทางหน้าได้
ขั้นลดคันนี้บ่มีน้ำมัน ลดคันนี้กะแล่นไปข้างหน้า หลือขี่ไปข้างหน้า หลือใซ้งานบ่ได้เลย
แล้วเขาเติมน้ำมันใส่ใส กะเติมน้ำมันใส่ถังน้ำมัน ลดคันนี้มีถังน้ำมันพ้อม เพื่อที่สิเก็บน้ำมันไว้ในถังนั้น เพื่อที่สิใซ้งานได้ ให้ลดคันนี้ใซ้งานได้ หลือขี่ไปข้างหน้าได้

Basic vocabulary — Page 27 — Series B, pictures 04-07: moustache, beard, to shave, razor, razor blade

4
นี้คือพุใด จักคือกัน บ่ฮู้ว่าเขาเป็นใผ ฮู้แต่ว่าเขาเป็นพุซาย
หน้าตาเขาเป็นจั่งใด หน้าตาเขามีหนวด มีหนวดพ้อม หนวดสีดำๆ
หนวดคืออี่หยัง หนวดกะเป็นหนวดที่มันเกิดเป็นขนอยู่ใต้ดัง หลือว่าอยู่เทิงปาก
หนวดนี้มันเส้นญาวบ่ แล้วแต่ แล้วแต่หนวดของคน บางคนกะหนวดญาว บางคนกะหนวดสั้น แล้วแต่เขาสิจ่ง แล้วแต่เขาสิไว้
แล้วคนคนนี้ ผมกับหนวดของเขา อี่หยังญาวกว่ากัน กะผมเลยเนาะ ผมของเขาญาวกว่าหนวด หนวดของเขาสั้นๆ หนึ่ง หนวดของเขาบ่ญาวหลาย ญาวพอดี ญาวหน่อยเดียว

5
เขามีหน้าตาเป็นจั่งใด หน้าตาของเขามีหนวดพ้อม เทิงหนวดเทิงเคา ผมกะญาว เฮ็ดปึ่กซึกอยู่
หนวดกับเคาหนิคือกันบ่ กะค้ายๆ กัน หนวดกะคือสิเกิดอยู่เทิงปาก หลือว่าอยู่ใต้ดัง หม้องนั้นหละ แล้วกะสิเกิดอยู่ใต้ปากหน่อยหนึ่ง
แล้วเคาเด๊ เกิดอยู่ใส เคานั้นกะสิเกิดอยู่ใต้คาง เขากะสิเอิ้นว่าเคา เพาะสะนั้นแล้วหนวดกับเคาสิเกิดอยู่คนละหม้อง เกิดอยู่คนละบ่อน
ผมกับหนวดหนิคือกันบ่ บ่ ผมกะสิเกิดอยู่เทิงหัว หลือว่าเกิดอยู่หัวของเฮา หนวดกับเคากะสิเกิดอยู่หม้องที่เอ่ยไปหลือว่าเว้าไปหนั้นหละ
แล้วคนเฮานี้สิมักไว้หนวดไว้เคาบ่ กะแล้วแต่ แล้วแต่คนมัก พุใดมักกะจ่งหลือว่าเอาไว้ พุใดบ่มักกะโกนออกหลือว่าบ่จ่งไว้หนั้นหละ

6
นี้คืออี่หยัง อันนี้คือแนวโกนหนวด แล้วกะมีดโกนหนวดพ้อม
แนวโกนหนวดเอาไว้เฮ็ดหญัง กะเอาไว้ถ้าโกนหนวดหนั้นหละ เอาไว้ถ้าตัดหนวดหลือว่าโกนหนวดออกจากปากหลือว่าจากคางของเฮา เพื่อสิให้มันเกี้ยงเกา หลือว่าบ่ให้มันมีหนวดญาวหนั้นหละ
แนวโกนหนวดเป็นจั่งใด แนวโกนหนวดหนั้นกะสิเป็นสีขาวๆ เป็นฟองขาวๆ เอาไว้ถ้าบีบใส่เส้นหนวดของเฮา หลือว่าเส้น เส้นขนของเฮา เพื่อที่เฮาสิโกนออก กะใซ้มีดโกนที่มันคมๆ กะมาโกนออกๆ เพื่อที่สิตัดขนนั้นออก บ่ให้มันมีขนอยู่หน้าของเฮา
มีดโกนหนิกะเฮ็ดจากอี่หยัง กะเฮ็ดจากมีด เพาะว่ามันต้องคม มันต้องมีคมคัก แล้วมันกะต้องสามาดตัดขนได้พ้อม มันจั่งสิเป็นมีดโกนหนวด

7
เขากำลังเฮ็ดหญังอยู่ พุซายพุหนึ่ง เขากำลังโกนหนวดอยู่
เขาโกนหนวดจั่งใด เขากะใซ้แนวโกนหนวดแล้วกะมีดโกนหนวดกำลังโกนหนวดของเขา
เขาเอาแนวโกนหนวดบีบใส่ใส กะบีบใส่หม้องคาง หลือว่าใส่ปากของเขา หลือว่าใส่หม้องหนวดที่เขามี หลือว่าหม้องที่หนวดมันเกิด
เป็นหญังเขาต้องบีบใส่หม้องหั้น กะญ้อนว่าเขาอยากโกน เขากะเลยบีบใส่หม้องหั้น
อยากโกนหม้องใด อยากโกนหนวดหม้องใดออก กะบีบใส่หม้องหนั้น หม้องใดบ่อยากโกน กะบ่ต้องบีบใส่
บีบใส่แล้วเฮ็ดจั่งใดต่อไป บีบใส่แล้วๆ กะบีบใส่พอปะมาน หลือว่าให้มันพอดีกับหนวดของเฮา แล้วเฮากะใซ้มีดโกนๆๆ ออก หลือว่าตัดๆๆ ออก แล้วหนวดของเฮากะสิบ่มี หลือว่าหนวดของเฮากะสิหายไป สิเฮ็ดให้หน้าเฮาเกี้ยงเกา หลือว่าบ่มีหนวดเลย